BOAC, Marinduque -- Napakikinabangan na ng mga residente ang bagong gawang multi-purpose building sa Barangay Isok II sa bayan ng Boac.
Ito ay matapos bendisyunan at pormal na pasinayaan ang nasabing istruktura na pinangunahan ni Cong. Lord Allan Jay Velasco kasama si Kapitan Alberto Malvar at iba pang mga opisyales mula sa pamahalaan.
Ayon kay Malvar, magagamit ang nasabing gusali nang humigit 265 na pamilya o nasa 800 na mamamayan ng kanilang barangay.
"Labis po akong nagpapasalamat sa lahat ng tumulong para maipatayo ang covered court na ito lalo na kay Cong. Allan at Gov. Presby Velasco sapagkat marami pong mga eskwelahan ang nakapaligid sa aming lugar. Nandiyan po ang Marinduque National High School, Don Luis Hidalgo Memorial School at iba pa kaya lubos itong mapakikinabangan lalo na ng mga mag-aaral sa tuwing mayroon silang school activity," pahayag ng kapitan ng barangay.
Base sa ulat ng Department of Public Works and Highways (DPWH), P4,845,337.66 ang halaga ng pondong inilaan dito ng gobyerno sa ilalim ng Regular Infrastrature General Appropriations Act of 2021. (Romeo Mataac Jr/PIA)
