GASAN, Marinduque -- Arestado ng mga awtoridad ang dalawang lalaki na tulak umano ng iligal na droga sa ikinasang buy-bust operation sa Barangay Bacong Bacong, bayan ng Gasan.
Kinilala ng Gasan Municipal Police Station (MPS) ang mga suspek na sina Alyas Tiktik, 42 anyos, residente ng Barangay Banuyo, Gasan at Alyas Batik, 33 anyos, taga Barangay Daykitin, Buenavista, kapwa mangingisda at tinaguriang bagong 'high value individuals'.
Nasamsam sa mga suspek ang hinihinalang shabu na tumitimbang ng humigit-kumulang 0.7 gramo na nagkakahalaga ng P2,000 matapos magbenta sa isang asset na nagpanggap na buyer.
Nasa kustodiya na ng pulisya ang mga suspek at mahaharap sa kasong paglabag sa Republic Act 9165 o Comprehensive Dangerous Drugs Act of 2002. (RAMJR/AMKDA/MNN)
